Hvítasunnusálmur: Sigubjörn Einarsson biskup

Hvítasunna er stofndagur kirkjunnar og hátíð heilags anda. Þá töluðu postularnir tungum framandi þjóða er heilagur andi kom yfir þá á hinni fyrstu hvítasunnuhátíð: þá gaf Kristur þeim boðið að fara út um allan heim, skíra og predika, orð Drottins.

 

Sálmur 724:

 

Leiftra þú, sól, þér heilsar hvítasunna,
heilaga lindin alls, sem birtu færir
hann, sem hvern geisla alheims á og nærir,
eilífur faðir ljóssins skín á þig,
andar nú sinni elsku yfir þig.

 

Ljóma þú, jörð, þér lýsir hvítasunna,
lífgjöf þín, Kristur, risinn upp frá dauðum,
opnar sinn himin heimi vonarsnauðum,
heilagur andi streymir yfir þig,
andar nú sinni elsku yfir þig.

 

Geisla þú, sál, mót sól þíns lífs og fagna,
sjá, það er vor á jörð, sem Drottinn gefur,
vittu það, barn, og vakna þú, sem sefur,
vitjar þín andi Guðs og skín um þig,
andar nú sinni elsku inn í þig.

 

Lýstu mér, sólin hvíta, heita, bjarta,
heilagi andi Guðs og Krists, hans sonar,
uppspretta ljóss og friðar, lífsins vonar,
ljúk mér upp, kom þú, streym þú yfir mig,
anda nú þinni elsku inn í mig.

 

Sigurbjörn Einarsson biskup, sálur nr. 724